Saalperd word Wêreldkampioen

MEER as 15 000 mense was op hul voete toe 'n Suid-Afrikaanse saalperd aangewys is as die wêreldkampioen in Louisville, Kentucky.
Hierdeur het die spogperd, WGCH Casey's Final Countdown, die gesogte $100 000 "Big Stake" ingepalm.
Dis maar die tweede keer dat 'n Suid-Afrikaans gebore saalperd wêreldkampioen word, en die eerste keer dat só 'n perd nog in Suid-Afrikaanse besit is.
Die Si-Si Trust van Bloemfontein besit dié perd saam met die Michele Macfarlane wat Saterdagaand die tuig vasgehou het.
Die enigste ander saalperd uit ons land wat wêreldkampioen kon word was Zovoorbij Commander in Chief. Hy is in Philippolis geteel op die plaas van wyle Jack Schoeman.
Dit was op die einste Philippolis wat Countdown drie jaar gelede aangewys is as die vyfgang kampioen. Jan Kok was toe in die saal.
'n Amerikaanse saalperdtydskrif het toe verwys na Philippolis se saalperdskou as "The Show of World Champions".
Macfarlane was só beïndruk met Countdown by die Philippolis-skou dat sy spesiaal na hom kom kyk het in Suid-Afrika.
Die laaste Suid-Afrikaanse skou waaraan hy deelgeneem het was in Petrusburg waar hy weer asie groot kampioenskapprys verower het.
Om hom in die VSA te kry het sewe maande se kwarantyn gekos in Kaapstad en Duitsland.
Saalperd kom oorspronklik van die VSA en is sedert 1916 na Suid-Afrika ingevoer.
Ruelda Viljoen sê: "Die Amerikaners is vreeslik beïndruk met die bewegings van ons super-geharde perde, asook hul harte - iets wat hulle verloor het deur die jare."
In die VSA is Macfarlane, en Countdown, "The Stud from South Africa" reeds bestempel as die beste perd/ruiter-kombinasie in die geskiedenis van saalperde.
WGCH Casey's Final Countdown is vernoem na die Viljoens se dogter, Christil Casey.

Groenhuis Gastehuis, Philippolis, Tel. 051 773 0073

Mis(troostige) weer

Mis hang oor die plaas Dwarsrivier van Willem en Franette Strauss tussen Philippolis en Trompsburg.

Bibberweer: Koudste nog

Saterdagnag was die koudste nog hierdie winter in Philippolis. Minus 9 C is aangeteken. Op die meegaande foto skyn die eerste sonstrale van die dag flouerig op 'n hardgevriesde Karoo-veld.

Historiese juweel in mark vir rekordbedrag

Die Van der Post-gebouekompleks langs Colin Fraserstraat, Philippolis, is in die mark vir R2,4 miljoen. Dis by verre ‘n rekord, want geen huis was al vantevore in Philippolis só geprys nie.

Die skrywer, sir Laurens van der Post, het sy kinderjare hier deurgebring terwyl bekende staatsmanne van weleer by sy ouers aangedoen het.

Die Victoriaanse Van der Post-huis langs Colin Fraserstraat 7, is in 1872 gebou. In 1906 is sir Laurens daar gebore. Sy pa was C.W.H. van der Post, ‘n prokureur en volksraadslid. Sy ma, Lammie, was ‘n formidabele vrou wat veertig jaar na haar man eers tot sterwe gekom het en wat op ‘n gevorderde leeftyd begin boer het.

Die Van der Post-huis, ‘n nasionale gedenkwaardigheid, word omring deur twee ander historiese huise, naamlik Colin Fraserstraat 9 (gebou in 1874), en die Emily Eagle Cottage langs Colin Fraserserstraat 5

In sir Laurens se kinderjare het beide Nr. 7 en Nr. 9 aan sy familie behoort. Sy pa het Nr. 9 gebruik as kantoor en as 'n biljard-kamer.

Die Emily Eagle Cottage is genoem na die vrou van John Nunn Eagle, die eerste dokter in Philippolis tussen 1861 en 1900. Dr. Eagle se sewende kind, Millie, is getroud met John Ingle, ‘n voorsaat van Mark Ingle wat deesdae in Nr. 5 woon.

Die 46 olyfbome wat enkele jaar gelede in die agterplaas geplant is, is besig om te begin dra. Die tuine is propvol granate, vye, moerbeie en druiwe.

Daar is dokumentêre bewyse dat ‘n Britse soldaat iewers in die agterplaas begrawe is. Van sir Laurens se as het ook hul laaste rusplek hier gekry onder een van die ou bome. In sy geskrifte verwys dié skrywer gereeld na hierdie tuin.

‘n Historiese koetshuis tussen Nrs. 5 en 7 dateer waarskynlik uit die Griekwa-era (voor-1860).

Die Van der Post-familie het hier bly woon na die dood van C.W.H. van der Post in 1914 tot 1922. Hierna is dit deur ‘n mev. Wentworth bedryf as losieshuis namens mev. Van der Post wat gaan boer het op die familieplaas, Wolwekop.

In die vroeë-1920’s is Nr. 7 verkoop aan Mev. Rothbart. Sy het dele van die koetshuis omskep in ‘n sinagoge en ‘n schul. Die boonste verdieping is as koshuis gebruik vir die Joodse seuns.

‘n Vyftien jaar later het dit die eiendom geword van Mnr. Schoeman. Ironies genoeg was hy ‘n lid van die neo-Nazi Ossewabrandwag. Die boonste verdieping van die koetshuis is toe gebruik as ‘n geheime vergaderplek van hierdie organisasie.

Die huidige eienaars, mnr. Mark Ingle en dr. Doreen Atkinson, besit Nr. 7 vanaf 1994. Twee jaar later het hulle Nr. 9 gekoop en só het die huise vir die eerste keer in sewentig jaar weer ‘n eenheid gevorm – nes in die Van der Post-dae.

Sedertdien het die huise gedien as ‘n familiewoning, gastehuis en kantoor vir die Karoo Navorsingsinstituut.

* Vir meer inligting bel Rhys Mowat by 051 753 1416.

Fraaie vlegwerk

Klein Lucinda Derrison, 'n leerling van Bergmanshoogte Intermediêr, se hare is pragtig gevleg. Maar dis nie kinderspeletjies nie. Lucinda sê om só 'n kop netjies te vleg wat etlike ure.

Bergfietsroete strek oor 140 km

‘n ONGEWONE bergfietsroete word hierdie naweek geloods waar die distrikste van Hanover, Colesberg en Philippolis bymekaar kom.
Oor drie dae sal vyftien fietsryers 140 km aflê oor ‘n uiters onherbergsame gebied.
Die roete begin in Hanover en strek dan al langs die Seekoeirivier af tot by die Doringkloofnatuurreservaat.
Dié reservaat grens aan die Oranjerivier wat hier opstaat in die Vanderkloofdam.
P.G. van den Heever, ‘n organiseerder, sê ‘n boot sal die fietsryers oor die dam neem na die Vrystaatse kant van die Oranjerivier.
Hiér in die Philippolis-distrik sal hulle fiets oor en deur die berge en klowe van plase soos Kromdam en Jansfontein. Daar sal ook by ‘n tierreservaat aangedoen word.
"Hoewel die roete oor 140 km strek sal ons net deur vier kommersiële boere se grond ry. Die res bestaan alles uit wildtuine."
Daar is nie meer plek op hierdie lanch vir ekstra fietsryers nie, maar mense wat belangstel vir toekomstige ritte kan P.G. skakel by 082 556 5572.